الرئيس إرادة شعب … بقلم/ نورا سمير فرج

متابعة / عادل شلبي.

جولة الإعادة اللي جاية مش مجرد مرحلة انتخابية… دي رسالة..
الرئيس لمح وطلب بنفسه النظر في الطعون،
وبالفعل اللجنة العليا أعادت الانتخابات في ١٩ دائرة.
وده معناه إن الرئيس فعلًا عايز يشوف انتخابات ناجحة، نزيهة، وفعّالة…
وعايز يشوف إرادة الناس بوضوح.
البلد عملت اللي عليها… والباقي علينا إحنا.

لكن المشكلة إننا كشعب ساعات بنختار نقعد على الكنبة،
وننتقد من بعيد،
ونقول:
“مش هننزل…
“مش فارقة…
“هما بينجحوا اللي هما عايزينه”.

طب هل تتخيل إن الرئيس عايز ناس بعينهم؟
هل عايز مرشحين محددين؟
طبعًا لأ.

الرئيس نفسه عايز يشوف إرادة شعب حقيقية،
وعايز يشوف الأنجح والأكفأ…
علشان يساعدوه في التشريع،
وفي الشغل علي الأرض،
وفي خدمة الناس،
وفي طرح أفكار جديدة تفيد البلد.

لأن أي نائب شاطر… ملتزم… فاهم… وبيشتغل…
هيكون إضافة للدولة
ويسهّل على الحكومة
ويخلي البلد تكبر أسرع.

يبقى أكيد اختيار الشعب الصح… ومشاركته الصح… مصلحة للبلد كلها.

الحقيقة البسيطة اللي لازم نفهمها هي:
لو أنت نزلت… يبقى أنت اللي بتختار.
ولو ما نزلتش… يبقى أنت سبت صوتك لغيرك.

الانتقاد مش حل.
الفيس بوك مش صندوق انتخاب.
والكلام مش بديل عن الفعل.

انزل… شارك… اختار بضمير.
اختار اللي يستاهل… اللي بيشتغل بجد…
اللي بيخدم على الأرض بصدق وإخلاص.

و حتي لو المرة دي المرشحين مش عاجباكم…
المرة الجاية هتختلف لما يبقى فيه شعب بينزل بجد،
ويختار بوعي،
ويقف قدام الصندوق وهو عارف قيمة صوته…
وساعتها كل نائب هيعرف إن الشعب واعي وفاهم،
وإن الصوت مش هيروح غير لمن يستحقّه.

كفاية انتقاد على الفاضي…
وكل واحد يعمل اللي عليه قدام ربنا… وقدام بلده.
تحيا مصر يحيا الوطن بخير أجناد الأرض على الدوام