أقولك على سر المدمن بيدور على إيه؟
أوعى تفتكر إنه بيدور على الحشيش أو البرشام أو البودرة أو الفلوس أو أي حاجة من دول لا كل دي مجرد بدايل.وبدايل خيبانة
المدمن بيدور على حاجة تاني خاااالص حاجة فقدها من زمان
المدمن عنده ثقب أسود كبير جدا في نفسه بيحاول يملاه بأي شكل ويبلع من خلاله أي حاجة.المدمن عنده احتياج نفسي أساسي وعميق المدمن
المدمن محتاج علاقة مع حد. بس مش أي علاقة.ومش أي حد.المدمن محتاج علاقة مع حد ما يقولهوش لاء على الفاضية والمليانة. زي ما كان بيتقاله من أبوه وأمه زمان.
المدمن محتاج علاقة مع حد يلاقيه وقت ما يحتاجله. مش يكون مسافر أو مشغول عنه ومش مهتم بيه.المدمن محتاج علاقة مع حد يسعده ويفرحه بدون شروط حتى وهو في أتعس وأضعف حالاته الإنسانية مش حد يديله ده بشروط المدمن محتاج علاقة مع حد يخفّف عنه إحساسه العميق بالألم ويطبطب عليه ويطيب جراحه. مش حد يدوس على جرحه ويحسسه بالذنب مع كل نفس بيتنفسه.
المدمن محتاج علاقة مع حد يرضيه ويشبع حرمان واحتياج سنينه وأيامه الأولى لغاية ما يفقد وعيه من الشبع وينام من الرضا. زي الطفل الرضيع في حضن أمه. مش حد يتفنن في سلبه وحرمانه من حقه في الشبع ومتعته في الرضا.المدمن اتحرم من علاقة واحدة في حياته توصله ده. بس لقاه كله إدمان. بغض النّظر عن اسمها وطبيعتها: ما بتقولهوش لا على الفاضية والمليانة. بيلاقيها وقت ما يحتاجلها. بتسعده وتبسطه وهو في أضعف حالاته . المدمن هايفضل يدمن طول ما العلاقة الإنسانيه مش موجودة. لكن لو العلاقة دي اتوجدت مع أي حد حواليه هايبطل إدمان. مهما كان شكل إدمانه.علاقة حقيقية فيها حب غير مشروط وقبول واحترام وسماح وتفهم واستيعاب. مهما حصل.علاقة حقيقية فيها تقدير وقرب واهتمام
علاقة حقيقية تكون مليانة صدق ورحمة. في كل الظروف والحالات.اللي معندوش العلاقة دي يقوم يدور عليها. لغاية ما يلاقيها. ويتمسك بيها. ويحافظ عليها. لأن البديل تمنه غالي غالي أوي.
